「食果子、拜樹頭」

     今仔日，我欲演講的題目是「食果子，拜樹頭」。咱台灣有一句俗語講：「食果子拜樹頭，食米飯敬鋤頭」，亦著是叫咱做人一定要有感恩的心，定定去感謝咱身軀邊每一個人。阮阿公講卡早的人卡古意，In佇生活中攏是敬天、惜地、愛人民，可In叫咱食果子著愛拜樹頭。其實，拜樹頭只是一種形式而已，上主要是教示咱做人著愛有知恩報本的心，這才是食果子拜樹頭真正的意義。

 咱即馬遮好孔，會當食著遮呢濟飽水擱誠甜的果子，咱著愛感謝遮的果子樹，其實，我咧想，不只是果子樹，連種果子樹的人、送果子的運匠，抑（iah2）是賣果子的阿伯阿姆，咱是毋是攏愛去感謝In咧？擱卡免講艱苦趁（than3）錢互咱買果子食、共咱自紅紅幼幼捏（liap8 ）到大漢的老爸老母囉！

 會記得頂擺台北作風颱，北部一寡所在互水淹甲悽慘落魄，迄時陣，我在電視內底有看著誠濟南投縣的阿公阿婆拿（gia5) 鋤頭坐「土拉庫」來台北市鬥搗路糊糜，有記者問In會累袂？是按怎欲按呢做？In逐家攏喝（huah4 ）袂慄，In擱微微笑講921 大地動的時陣，台北有誠濟好心的人寄付袂少錢來共In鬥相共，互In渡過難關。這擺台北淹大水，In著緊起來共有需要的人鬥跤手。有的人講個遮的阿公、阿媽song 壁壁擱喝捌字，其實我感覺In上有智慧。In用感恩的心，講感謝的話，作感恩的代誌，這著是咱台灣人上寶貴的人情味！