「牛愛貫鼻，人愛教示」

    校長、各位老師，逐家平安。我今仔日欲演講的題目是「牛愛貫鼻，人愛教示」今年歇熱，我恰爸爸轉去鄉下的時陣，看著作檣人牽牛佇田岸仔路塊行，我著問阮爸爸：「是按怎牛一定要貫（kng）鼻，擱穿（cng）一個鼻環，予人用一條索仔牽塊行？」阮爸爸共我講：作檣人較知牛性，知影牛鼻是牛尚好控制的所在，只要佇牛的鼻空中央，共伊貫一個鼻環，穿一條索仔綁咧，欲牽牛去叨位，只要扭索仔，牛著乖乖仔聽話，叫伊向東伊著向東，叫伊往西伊著往西。牛若無貫鼻，作穡人欲牽牛嘛毋知欲牽叨位。

    阮爸爸擱講：咱人嘛是按呢，細漢囝仔是尚好教示的時陣，父母著愛把握時機，自細漢著共恁教示：啥物是著的，啥物毋著。俗語講：「細漢偷挽匏，大漢偷牽牛」，細漢的時陣，若是做毋著代誌，父母無好好教示，大漢了後，泛勢做出擱較大件的歹代誌。作檣人攏知：種啥物著收成啥物，無可能種瓠仔會生菜瓜。

    俗語講：「少年袂曉想，食老毋成樣」，少年的時咱的知識恰經驗攏較無夠，較衝碰，嘛較袂曉想，著愛咱身軀邊的大人，定定用他的智慧恰經驗，不時咧共咱教示恰提醒，予咱袂失覺察，做出毋著的憨代誌。若是無人教示，一錯再錯，到老啊才來反悔，按呢著袂赴啊。

    毋擱，教示雖然是為阮好，嘛愛用著的方式來教示。俗語講：「有心拍石石會萎（ui) ，無心做事半路廢（hui）」，教示人愛有疼心，愛心平氣和，袂使使性地。有時陣，大人塊教示囝仔的方法嘛真恐怖，親像是用箠（cue）仔槓，用跤cham ，抑是褊喙顖（sian cui phue ) ，槓甲歸身軀烏青激血，造成心內的怨恨，按呢嘛毋好。俗語講：「仙人拍鼓有時錯，跤步踏差哈人無」，每一個人攏有可能會做毋著代誌“只要咱有受教的心，會當接受大人的教示，每一個人，跤踏實地、一步一跤印，好好拍拚，相信咱一定有一個無暴力的和諧、進步的社會。

    我的演講到這結束，多謝。